| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 40.1 | Dem. 40.6 (English) | >>Dem. 40.9 |
40.5ὥστʼ ἐμοὶ μὲν δικαίως ἂν ἀδικουμένῳ διὰ πολλὰ βοηθήσαιτε , τούτοις δὲ εἰκότως ἂν ὀργίζοισθε · οἵτινες , ὦ γῆ καὶ θεοί , ἐξὸν αὐτοῖς τὰ δίκαια ποιήσασι μὴ εἰσιέναι εἰς δικαστήριον , οὐκ αἰσχύνονται μὲν ἀναμιμνῄσκοντες ὑμᾶς εἴ τι ἢ ὁ πατὴρ ἡμῶν μὴ ὀρθῶς διεπράξατο ἢ οὗτοι εἰς ἐκεῖνον ἥμαρτον , ἀναγκάζουσι δʼ ἐμὲ δικάζεσθαι αὑτοῖς . ἵνα δὲ ἀκριβῶς εἰδῆτε , ὡς οὐκ ἐγὼ τούτου αἴτιός εἰμι ἀλλʼ οὗτοι , ἐξ ἀρχῆς ὑμῖν , ὡς ἂν ἐν βραχυτάτοις δύνωμαι , διηγήσομαι τὰ πραχθέντα .
ἡ γὰρ μήτηρ ἡ ἐμή , ὦ ἄνδρες δικασταί , θυγάτηρ μὲν ἦν Πολυαράτου Χολαργέως , ἀδελφὴ δὲ Μενεξένου καὶ Βαθύλλου καὶ Περιάνδρου . ἐκδόντος δὲ αὐτὴν τοῦ πατρὸς Κλεομέδοντι τῷ Κλέωνος υἱεῖ , καὶ προῖκα τάλαντον ἐπιδόντος , τὸ μὲν πρῶτον τούτῳ συνῴκει · γενομένων δʼ αὐτῇ τριῶν μὲν θυγατέρων , υἱοῦ δʼ ἑνὸς Κλέωνος , καὶ μετὰ ταῦτα τοῦ ἀνδρὸς αὐτῇ τελευτήσαντος , ἀπολιποῦσα τὸν οἶκον καὶ κομισαμένη τὴν προῖκα ,
40.7πάλιν ἐκδόντων αὐτὴν τῶν ἀδελφῶν Μενεξένου καὶ Βαθύλλου (ὁ γὰρ Περίανδρος ἔτι παῖς ἦν ) καὶ τὸ τάλαντον ἐπιδόντων , συνῴκησε τῷ ἐμῷ πατρί . καὶ γίγνομαι αὐτοῖς ἐγώ τε καὶ ἄλλος ἀδελφὸς νεώτερος ἐμοῦ , ὃς ἔτι παῖς ὢν ἐτελεύτησεν . ὡς δʼ ἀληθῆ λέγω , περὶ τούτων ὑμῖν πρῶτον τοὺς μάρτυρας παρέξομαι .
40.6
Μάρτυρες
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 40.1 | Dem. 40.6 (English) | >>Dem. 40.9 |
